ملاحظة كيف تصبح ثرياً


كيف تصبح ثرياً

المحاضرة الأولى :

عشان تبدأ مشروعك وتبقى ثرياً لابد انك تتخذ بعض الخطوات , وهذه الخطوات مهمة حتى تستمر فى مشروعك ولا تفشل , فإذا بدأت مشروعك بدونها فاحتمال كبير ألا تستمر , احتمال كبير أن لا تقف مرة اخرى بعد الوقعة الأولى , فمن المؤكد انك ستقع فى اول الأمر أو حتى فى وسطه . وفى هذا الكورس جزء نظرى وجزء عملى

……………

قبل ما نبدأ عايزه اقول لكم الخطة اللى حنمشي عليها , عشان نبقى فاهمين احنا حنعمل ايه ,

أولا حنخاطب عقلنا ونفهمه ان ان المال ده مش حاجه وحشه زى ماكنا فاهمين , لازم نقتنع من جوانا بكده وان مش الصح اننا نكون زاهدين فى الدنيا عشان ندخل الجنة , اننا نكون فقرا , وان الفقرا اقرب الى ربنا , ده مش كلام صحيح ابدا , الرسول عليه الصلاة والسلام واى نبي خلقه ربنا كان بيشجع على العمل , الزاهد الحقيقى اللى يبقى في ايديه المال وبيستعمله كاداه بتخدمه لكن مش بيحبه زى مثلا ما بيحب عياله , ساعتها تعرف انك ماشى صح , انك عايز المال عشان تغني نفسك عن مد ايدك لحد وعشان تساعد اى حد محتاج , لأن اى عمل يخلو من مساعدة الناس لا اعتقد انه حيستمر للنهاية , حيقع حيقع , فلازم دى تكون تانى قاعده لينا

  • يبقى اول حاجه حنعملها اقناع عقلنا ان الفلوس النقود مش حاجه وحشه ولا عيب .يعنى محتاج تغير علاقتك بالمال , زى بالظبط ماحنا بندور على اننا نغير علاقتنا بالناس وازاى نعرف نتعامل معاهم , احنا دلوقت محتاجين اكتر من الناس , ازاى نغير علاقتنا بالمال , وده لسبب قوى جدا , ان حال الناس بيسوء وكل واحد دلوقت لازم يعتنمد على نفسه فقط , والعالم واحواله غير ثابتة والله اعلم ممكن يحصل ايه فى ثانيه جايه –حرب ولا مجاعه وساعتها حتبقى انت مين .. الى بيدور على لقمة فى القمامة , حفظكم الله … عشان ياكل ويأكل ولاده , ولا اللى بيوزع على الناس الاكل وفرص العمل , الله سبحانه وتعالى عايزنا نعمل , خلقنا عشان نعمل , ومافيش وقت اعتقد ان ربنا عايزنا نعمل فيه اكتر من دلوقت .
  • طيب تانى حاجه حعلم نفسي ما انى لا احطم المال , يعنى لما يبقى فى ايدى مال لا اهدره , ازاى اصبر على انى لا اشترى اشياء احتاجها فعلا , عشان اكون المال اللى محتاجه لمشروعى .. عارفين لو انا قلت لكم يالا نعمل دراسة جدوى ونبدا مشروع , يبقى بنضحك على بعض , او بضحك عليكم ,
  • وبعد ماتبقى معاك مال , ازاى حتنظمه , احنا هنا مش بنسعى دلوقت انك تبقى معاك حبة فلوس تجيب بيهم فرخة مشوية وسلطة وتاكل وتأنتخ , يعنى بالعربى تجيب حبة فلوس تاكل بيهم ولما تخلصهم تجيب غيرهم تتفسح بيهم وهكذا ,

 

  • ده تنبول الأكول اللى يعمل كده ,كان كرتون زمان واحنا صغيرين , اسمه تنبول الأكول , تنبول ده كان واحد تخين اوى ياكل وينام على كرسيه , والكرسي لزق فيه من كتر الاكل , صحى من النوم لقى الكرسي لازم لا عارف يقوم يلعب مع الاطفال ولا عارف يتحرك من كسله

 

  •  عايزين نتعلم ازاى نكون مال ونحافظ عليه ونكبره , صحيح حناكل ونشرب , لكن حناخد احتياجاتنا فقط القليلة اللى تسد رمقنا , وبرضه مش حنبقى انيميا , لا , عايزين ناس عندها صحة عشان نشتغل صح , يبقى محتاج انك تشوف ايه الأكل الصحي , مش فيه سمنه كتير , يعنى ربع كوسه واسلقهم وكلهم , حديد وفيتامين يوقفك تشتغل اربع خمس ساعات بصحة .. عايزين نبقى مظهرنا كويس ومش مخنوقين من تخننا , اتحكم فى عقلك الباطن وقلل من اكلك الغير صحى عشان لما تقابل حد وتقنعه بسلعتك يقتنع بيك من اول مره , عايزين نبقى مش قرفانين من نفسنا , برضه حنتكلم عن الموضوع ده وازاى نعمله .
  • ازاى اتخلص من حبي للشراء واقتناء الاشياء بالذات السيدات , ادمان الشراء من الاشتهاء للاشمئزاز , ده حنتعلمه .
  • عند بداية تدفق المال … الشهوة والطمع , حنتعامل معاهم ازاى .
  • خلق رؤية مستقبلية لنفسك , في سن كذا حكون كذا .
  • الكورس ده شامل ان شاء الله كورسات كتير اوى , خط الزمن , برمجة , passion to profit , قيادة , ارشاد أسري , صحة نفسية , لأنك طبعا بتتعلم تعالج نفسك من البرمجة القديمة اللى برمجتها لعقلك , بتتعلم ازاى تتعامل مع الشخصيات المختلفة من البشر , وكمان دراسات جدوى , وازاى تعمل المشروع بتاعك وتنجحه واللى عايزه تتبنى فكره وتبدا فيها أثناء ماحنا شغالين , فكره بسيطة اوى او تبدأ تتعلم فى المجال اللى هى حباه وتجرب بامكانيات بسيطة اوى اثناء ما احنا شغالين مافيش مشكلة , جيبى تعليم من النت وابدأى جربى , ابحث كتير عن الحاجه اللى بتحبها وفكر وقرر كده كده حنطبق ده واحنا ماشيين سوا .
  • بعد كده حنبدا نتعرف , على كيف تحصل على المال , ايه المنتج اللى الناس محتاجاه ., لو فى جيبك 100 ج ازاى تبدا تضاعف المبلغ ده . انت مصدر مالك .

 

  • بعد كده ازاى تجمع فريق يشتغل معاك .. فريق الأحلام .

 

  • وضع خطة عمل

 

  • ازاى تحسب المخاطر وتراجع اللى بتعمله دايما

 

  • كيفية سير مشروعك , والاجراءات المتخذة

 

  • مهارات جني الثروات ..

 

  • الوصول الى زبائنك .

 

  • التسويق .

 

  • واخيرا اسرار الحياة الثرية , ده بعد ان شاء الله ماتبقى غني وتحقق اللى انت عايزه .

 

  • ………………………………………………

الجزء النظرى عبارة عن برمجة نفسك وعقلك على أنك ممكن تكون غني , لأن لو عقلك وتفكيرك فى سكة وتصرفاتك فى سكة عمرك ماحتنجح , لازم الأول تبرمج نفسك على انك انسان ناجح , زى بالظبط لما بنقعد نخطط لحاجه او نكتب هدف , مش كتير فينا بيقعد يكتب هدف لحياته ويكتب ويكتب وفى الآخر مش بينفذ منه حاجه , ليه مش بينفذه , لأنه بيكتب بايديه فقط , مش بيكتبه بكل احساساته , وعقله .

عارفه ان فيه ناس كتير مش بتعتقد فى برمجة العقل الباطن وبتعتبرها حرام .. حقول لك أنا من منطلق ايه بتحكم فى عقلى وبخليه يتصرف حسب ما انا عايزه , بالظبط زى الدعاء . . مش فيه فرق بين واحد بيدعى كتير وواحد مش بيدعى خالص , مش واحد ربنا بيستجيب له وواحد مش بيدعى حيمشى عادى فى حياته لكن مش حيعمل اللى نفسه فيه , لأن بالالحاح الدعاء بيستجاب , وربنا سبحانه وتعالى بيقول كده : ادعونى استجب لكم وفيه احاديث بتدل على ان مع التوسل والالحاح ربنا بيستجيب … عارفين ان مع الالحاح والتصميم على استجابة الدعاء فيه برمجة لعقلى , ازاى .. انا بفضل ادعى واقول يارب نفسي انجح بتفوق يارب نفسي انجح بتفوق , يارب نفسي انجح بتفوق , فيه واحد بيدعي نفس الدعاء وهو نايم ومش بيعمل حاجه , وفيه واحد تانى فاهم انه لازم ياخد الاسباب مع الدعاء , لازم يتعب ويحاول ويدعى , تلاقى ربنا بيستجيب للتانى اللى تعب والاول يادوب بينجح اذا نجح , الاول برمج عقله صح وفهم القصه , يعنى العمل مع الدعاء .

يعنى التفكير الصح مع انى امشى نحو تحقيق الهدف مش بس اقعد اكتب اهداف وماعملش حاجه , واقعد اتحجج لنفسي , اصل ماعييش فلوس ابدأ , اصلى جوزى مش موافق ,, اعملى اى حاجه اتحايلى عليه , استخدمى مكر النساء بس ماتعمليش حاجه حرام طبعا , ادعى كتير انه يوافق , اصبرى شويه يمكن ربنا حيعوضلك السنين كلها فى سنه واحده , يمكن ربنا عارف ان عيالك صغيرين ومحتاجينلك , فى الوقت ده ماتقعديش ساكته , اقعدى حوشي , مش معاكى فلوس طيب اقعدى اقرى كتير واكتبى حعمل ايه , خططى , اعملى علاقات اجتماعية , زى مابيقولوا بالبلدى كده اعملى لنفسك فرشه , او قاعده , اول مايبقى عندك الفرصه حتبدأى على طول وتنجحى .

فيه نقطه كمان لازم نفهمها , مش معنى انى بدعى بحاجه واقنعت عقلى الباطن بيها ان كل اللى بدعيه ومقتنعه بيه لازم يتحقق , لو دعيتى كتير وبرمجتى نفسك وكله تمام ومافيش فايده , يبقى اقف وقفه وافكر , اكيد مش هو ده الخير , اكيد ربنا عايزنى افكر فى حاجه احسن , ومن الاول تكون حاطط لنفسك بدائل , مش الهدف مايتحققش تقعد تعيط , خللى هدفك النجاح فى كل الاحوال بغض النظر عن النجاح فى ايه .

اما الكلام بالنسبة للشباب حيبقى مختلف شويه , لأن العراقيل عندهم مختلفة شويه , صحيح اهمها عقلهم وبرمجته واختيار الصح فى حياتهم , لكن فيه عراقيل تانيه , زى المجتمع حيقول عليه ايه , والدى مش موافق اشتغل كده , لازم الوظيفه عشان البرستيج , لازم اقعد على مكتب وابقى هيئة كده .

كل ده حنشوفه سوا , وازاى تتخلص من لاأفكار دى عشان تبدا حياتك صح , اوعى تقول لى انا كبرت , هو انا لسه حبدأ , اوعى الكلام ده , امال اللى فى الستين وبدا مشروعه , ايه خايف تموت وتسيب اللى عملته , مايمكن اسمك يخلد للأبد , مش حتموت ساعتها , يمكن عملك ده تفتح بيه بيوت لمدة قرون طويله ويدعوا لك ويرفعوك , يمكن انت نفسك تعيش كتير انت ايه اللى عرفك .

فيه نقطه كمان

ومن لا يستطيع الصبر على الجزء النظرى من الكورس فلن يستطيع الصبر على تجارته ولن يستمر بها .

  • فلك حرية القرار وحرية الاختيار من الآن .
  • سوف نتعلم كيف نفكر ونتصرف مثل أكثر الأشخاص نجاحا فى العالم .
  • سوف تصبح مثل كبير الطهاة الذى يقدم لمسته الخاصة بوصفة معروفة لكل الناس ولكن لمسته هى التى جعلته مميز بطعم معين لا يبرع فيه غيره .
  • لمستك هو نجاحك الخاص بك , هى أفكارك الخاصة التى ستطورها لتحقق لك النجاح .
  • وخلال تعلمنا هنا سوف نعرف أن الحصول على المال مثله مثل أى مهارة , لا يحتاج إلى شخص معين , فلا تقل أبداً أنا لا أنفع فى التجارة , إن لها أشخاص خاصة بها .
  • سوف تعرف أنماط سلوك وتسعى إلى تغييرها من خلال هذا الكورس .
  • وتوقع أن تعارض بعض أنماط السلوك فى هذا الكورس .

,,,,,,,,,,,,,,,,,,,,,,,,,,,,,,,,,,,,,,,

فيه كمان مهارات كتير لازم تتعلمها قبل ماتبدأ مشروعك , لو اتعلمتها اضمن لك ان عمرك ماحتفشل , بس خليك عارف الفشل مش معناه انى عملت مشروع والنشاط اللى عملته ده مانفعش معايا او مانفعش فى السوق , لأ , الفشل انك ماتحاولش , او تحاول وتيأس وتسكت , انما النجاح الاكتر انك تحاول وتحاول كتير حتى لو غيرت نشاطك مرتين تلاته

فيه مهارات معينة لازم حتتعلمها , منها مهارات القيادة , لأنك حتكون قائد ومسيطر على حياتك أولا ومشروعك ثانياً .

ماينفعش اقول لك يالا عايز تعمل مشروع , تعالى نعمل دراسة جدوى ونبدأ , يالا بسرعة انا مستعجل وعايز اعمل قرش بسرعه اوى عشان اتجوز والحق اخلف لى عيل مانلاقيش ناكل انا وهو .

ده بقى الفشل بعينه , عايز تبدا بسرعه روح ابدأ ماحدش حاشك , اديك شايف الناجحين والاغنياء معدودين على الصوابع , عايز تبقى منهم ولا عايز تعمل كشك حلوى وتقف فيه وتأكل عيالك بالعافية وتدخل مدارس اى كلام .

 

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

اول حاجه طبعا بنعملها وكلنا عارفينها ,, احط هدف لنفسي , طيب انا عايز دلوقت احط هدف لنفسي , عايز ابقى غني ليه .

  • ما الذى تفكر فيه عندما تفكر فى أن تصبح غنياً :
  • هل تتخيل نفسك تركب سيارة غالية اوى , وبيت ضخم , وتسافر بره تتفسح .
  • ام ان الصورة اللى بتحضر لذهنك لما بتفكر فى الثراء راجل تخين بكرش لابس ملابس غالية وبيدخن السجاير الكبيرة التخينة دى .. وحاطط قدامه كومة فلوس بيعدها او بيبصلها .
  • او بتتخيل انك غنى وبتتبرع للجمعيات الخيرية .
  • اى صورة من دول افضل برأيكم ؟
  • تصرفاتك فى حياتك بعد كده بتحددها الصوة اللى تخليتها لنفسك من دول
  • مش شرط تكون مين فى دول , لكن المهم انك تبقى غني لهدف انت تحدده لنفسك بشروطك انت وحدودك وامكانياتك انت .حسب رؤيتك واحتياجك انت .وحط هدف للناس معاك .
  • حدد تفكيرك – حدد هدفك : زى مابيقول نابليون هيل , لا يمكن انجاز اى شيء عالى القيمة بدون وجود هدف محدد

,,,,,,,,,,,,,,,,,,,,,,,,,,,,,,,,,,,,,,

استخدام قوة التفكير مش حاجه جديدة اخترعوها الناس اليومين دول , ابداً دى حاجه بقالها سنين واثبتوها بالفعل , يعنى طبقوها فى حياتهم الناجحين واصبحوا مشهورين وناجحين واغنياء .

  • من تمانين سنه كان فيه واحد من اغنى الرجال فى العالم اسمه اندرو كارنيجي , كان مقتنع انه اكتشف السر الحقيقي لتكوين الثروة , وفوض مراسل صحفى انه يعمل مقابلات مع 400 من اغنى الاشخاص فى العالم عشان يعمل بحث عن طريقة تكوينهم لثرواتهم , يمكن فيه ناس عارفين نابليون هيل , دلوقت مشهور بكتبه الرائعه زى …..
  • قعد هيل 20 سنه فى البحث ومقابلة الاغنياء والناجحين , واكتشف انهم اتبعوا نفس الخطة البسيطة لتكوين الثروة . . وعمل كتاب اسمه think and grow rich , فكر لتصبح غنيا ,, وممكن ناخد من الكتاب ده مقتبسات وقصص للناجحين نتكلم عنهم .

,,,,,,,,,,,,,,,,,,,,,,,,,,,,,,,,,,,,

كتير بنكلم نفسنا ونقول : الاغنياء أو الاثرياء بالذات أكيد حرامية , هو فيه حد بيجيب الفلوس دى كلها بالحلال , أو انهم مجرد ناس محظوظين . لكن الحقيقة ببساطة انهم ناس عرفوا يستغلوا افكارهم ويقدروها .

  • شوف حواليك حتلاقى كنبة حلوه ومريحة , مين اللى عملها , حتلاقى سيارة بتركبها , السيارة دى لولا مخترع البنزين ماكناش استفدنا منها , كان البترول ده حاجه كده سودا غريبة مايعرفوش يستخدموه فى ايه .
  • السؤال بقى ليه ماتكونش انت صاحب فكرة , مش لازم تكون حاجه مش معروفة قبل كده , ممكن تكون حاجه معروفة ولكن استخدمتها بطريقة مختلفة , مش لازم تكون اينشتاين عشان تبتكر ,
  • عندنا طلبة كلية الفنون الجميلة بيستخدموا النحاس فى الاعمال الفنية , واحد من كتر استخدامه وحبه للنحاس فكر يعمل منه حاجه جميلة وفى نفس الوقت الوقت تتباع ويبقى لها سوق ويستفيد ويصرف على نفسه وهو فى الكلية , عمل ايه , جاب سلك نحاس وبدأ يعمل منه خواتم واساور ويعمل اشكال حلوه فيها تعجب البنات , ده عمل ايه , مش النحاس كان موجود قبل كده , مش كانوا بيعملوا منه حاجات حلوه بيزينوا بيها المكان زى اللوحات , بس هو اضاف عليه حاجه جديدة وبدأ غيره يقلده وانتشرت الفكرة وبداوا البنات يعملوها ويبيعوا ويستفيدوا .

الفرق بين الأغنياء والفقراء , ان الأغنياء قد تعلموا أن يقدروا قيمة أفكارهم .

,,,,,,,,,,,,,,,,,,,,,,,,,,,,,,

 

يقول الفيلسوف والروائي , آين راند

.. الثورة هي نتاج قدرة الانسان على التفكير ..

من أهم الحاجات اللى لازم نتعلمها في دراستنا للثروة , انك ماتقدرش تحدد مدى ثراء شخص من السيارة اللى بيقودها او من خلال حسابه فى البنك , يعنى احنا هنا مش بنتعلم الفرق بين الغني وبين الفقير , لأ ,, احنا بنتعلم الفرق بين الذين يفكرون بطريقة ثرية والذين يفكرون بطريقة فقيرة

ليه طيب الكلام ده , لأن المشكلة مش فى رصيدك فى البنك قد ايه , المشكلة فى حتستغله ازاى , فيه ناس بتحط فلوسها فى البنك وتفضل عايشه على القرشين الفوايد اللى بيطلعوا منهم ويعيشوا منهم ويموتوا وهم ماحققوش حاجه –علموا ايه –اكلوا وشربوا , هو ده هدفنا فى الحياة , لأ – حط هدفك انك تعيش حياة كريمة وتساعد غيرك يعيش حياة كريمة .

كيف تفكر بطريقة غنية , انك تفكر تجيب المال ازاى وتحافظ عليه وتنميه , انما تفكر بطريقة فقيرة , تجيب شوية مال محدود وتشترتى بيه حبة حاجات توهم نفسك بيها انك غنى وتحط حبه منه فى البنك وبكده انت اصبحت فقير مش غنى .

اذا ثروتك مش فى مكان بعيد , ثروتك بداخل عقلك , هى فى تفكيرك .

يقول أحد الأثرياء :

لما  كنت طفل رحت فى رحلة مع اسرتى , واول ليلة كانت السما مظلمة والسحب بتحجب ضوء القمر , وانا كنت صغير وكنت خايف لانى مش متعود على المكان .

لكن لحسن حظى كان معايا مصباح .. اضأت المصباح ناحية الضوضاء , ناحية الدوشة , لكن ماشفتش كويس , تانى ليلة رحت انا ووالدى نستكشف المكان وبدأت اطمن لكن برضه كنت حاسس بالأمان اكتر والمصباح فى ايدي , واتعرفت على المنطقة كويس , وبقيت عارف انا حعمل ايه وازاى حكون فى امان .

  • تعالوا نطبق الكلام ده على المال ,, ده لسه بيتكلم – ده كلام الثري اللى بيحكي لنا – بيقول لو طبقنا الكلام ده على عالم المال , لو انت مش متعود على العالم ده , حيبدو فى الاول مخيف بعض الشيء , وحتبقى متردد فى الأول … حتبقى قلقان من تجربة حاجات معينة لانك مش حتبقى عارف حتاخدك على فين ,

…………………………….

اى الاتجاهات ستسلك

يقول احد الناجحين – على مدار عشرين سنه تعاملت مع كثير من الناجحين وكنت منهدش جدا ازاى الناس دي بيقدروا يتمتعوا بثرواتهم , فيما ان ناس تانيه مقيدين بتفكيرهم المحدود .

حقول لكم امثلة على تأثير التفكير على الفقر : وعلى الشخصيات الغنية كمان .
مغنية مشهورة اسمها ماريا كارى تزيد ثروتها عن 100 مليون دولار ومع ذلك فى حوار تليفزيونى قالت: انها لا زالت تشعر احيانا انها غير آمنه مادياً .

مليارديرة اسمها مارثا ستيوارت قالت : صحيح انا عندى منزل جميل لقضاء الاجازات فى مكان جميل لكنه مش منزل احلامى , انا كان نفسي املك منزل على المحيط ومصنوع من الخشب وفيه قارب قدامه ومرسى صغير او بحيره .

اغنى الاغنياء حاسين انهم فقراء .. طيب ازاى

  • اذا امتلاك المال مش كافى عشان تكون ثري , لكن افكارك هى اللى بتخلى حياتك جيده أو لا .
  • لازم قبل أى حاجه تعرف قدرات عقلك اللانهائية , زى ماقال الدكتور ابراهيم الفقى الله يرحمه , مش ابدا , ده معظمه متعلم .
  • ايه رايك نكتب سوا , عندما تصبح غنيا كيف ستكون حياتك افضل من حيث
  • 1- العلاقات
    2- الحياه المهنية
  • 3- الأسرة
  • 4- الصحة
  • 5- الاسترخاء
  • 6- الحياة الروحانية .
  • اكتب ايه الاختلاف اللى حتشعر بيه فى حياتك فى النواحى دى

,,,,,,,,,,,,,,,,,,,,,,,,,,,,,,,,,,,,,,,,,

المسلمين فى غزوة أحد كان الرسول عليه الصلاة والسلام يشعر أن منهم من يريد من الحرب الغنيمة , ولكن كان المفروض ان يكون الهدف أسمى , انه يكون هداية الناس , لكن الرسول عليه الصلاة والسلام كان شاعر هم بيفكروا فى ايه – طبعا بعضهم اللى كانوا جداد فى الاسلام ولسه لم يثبتوا كويس , فقال لهم قبل الغزو , خليكم على الجبل واوعوا تنزلوا مهما حصل , الرماه مكانهم ودول مكانكم ودول تفضلوا مكانكم لحد ما اامركم , ومع ذلك هم نسيوا كل شيء وافتكروا اللى كانوا طول الوقت قبل الغزو واثناء الغزوة بيفكروا فيه , الغنائم , وبالفعل حصل ايه , اتهزموا .

هيلين كيلر , توماس اديسون

توماس اديسون عارفين طبعا قصة والدته لما المدرسة بعتت لها وقالت لها ابنك غبى جدا وماتجيبيهوش المدرسة , حتجيبيه تقرفينا بيه , قعديه بقى يا ستي وريحينا منه –زى مابنسمع اليومين دول , امه خبت الورقة اللى مكتوب فيها كده وقالت له المدرسة باعته جواب شكر وبتقول عليك اذكى واحد فيها , شوفوا الفرق , ايه اللى كان حيحصل لو كانت قالت له الحقيقه اللى قالوها عليه , زى ما قلنا , الذكاء ممكن يكون متعلم .

,,,,,,,,,,,,,,,,,,,,,,,,,,,,

  • استغل كل لحظة فى حياتك لتكون ثرياً فى كل شيء وليس فقط المال , يجب أن تشعر بما حولك وبمن حولك .
  • لابد انك تشعر بالمتعة فى حياتك وفى عملك عشان تقدر تكون متوافق نفسيا وتكمل العمل اللى بتعمله , لابد ان تكون عندك قيم عليا تسير عليها . زى ماقلت لكم قبل كده , من اهمها اننا نحس بغيرنا , اننا نساعدهم واحنا فى طريقنا لمساعدة غيرنا , هذا ناموس من نواميس الكون , يقول اغنى اغنياء العالم هذا ولسنا نؤلفه من انفسنا ,
  • وهذا ما خلق الله الانسان عليه , وده لان ربنا خلقنا جماعات مش فرادى , عشان كده لازم نتعاون ونساعد بعض .
  • نابليون هيل بيقول : كل الأفكار التى تكتسب صبغة عاطفية وتختلط بالايمان تبدأ فورا فى تحويل نفسها الى المقابل او المثيل المادى ,
  • يعنى الانسان الناجح مش شرط انه يكون انسان جامد ماعندوش مشاعر , على العكس تماما , بل المفروض انه عشان ينجح لازم يعمل اعتباره لعاطفته مع افكاره .
  • واللى مش مصدق انك لابد احيانا تحكم عاطفتك حقول لكم دليلين. دليل معنوى ودليل مادى .. الدليل المعنوى , ان احيانا فيه ناس بيجيلها اكتئاب بسبب عملها , بتكرهه لكنها مش قادره تسيبه , وفى نفس الوقت حاسس انه بيموت طول ماهو مستمر فى العمل ده , ده افضل له انه يمشى ورا عواطفه ويسيبه ويدور على عمل تانى حتى لو فضل شويه مش لاقى ياكل , حتى لو اشتغل فى البناء بعد ماكان مدير .
  • دليل علمى : يقول طبيب اسمه جوزيف ليدوكس خبير الجهاز العصبى بمركز العلوم العصبية فى جامعة نيويورك ان فيه فى المخ جزء صغير فى اعلى جذع المخ , فى جزء من المخ يعنى , بيقول ان الجزء ده هو الخاص بالتفكير اللاإرادى والحماس على العمل , يعنى مثلا لو طفل بيغرق بدون تفمكير حنجرى وننقذه قبل مانستخدم التفكير العقلانى – هل انا حغرق معاه ولا لا , هنا استخدمت التفكير العاطفى – الجزء من المخ ده خلانى استخدم العاطفة .

,,,,,,,,,,,,,,,,,,,,,

الايمان

فيه ناس بتسميها العاطفة وفيه ناس بتقول الروحانيات وناس بتقول الايمان , ايا ماكان سميتها ايه

نابليون هيل : عندما يمتزج الايمان مع ذبذبات الفكرة يتلقى العقل الباطن هذه الذبذبات فورا ويحولها الى العوامل الروحانية المقابلة لها ثم يحولها الى ذكاء غير محدود كما هو الحال بالنسبة للمصلى .

,,,,,,,,,

رجل دين اسمه لوجاستين بيقول :

ان الايمان هو ان نؤمن بما لا نراه وجائزة هذا الايمان هو ان نرى ما نؤمن به .

……………..

الايمان ببساطة هو احساس بالثقة وتأثير عميق وذكاء غير محدود

يعنى مثلا لما تكون منتظر الاوتوبيس مجرد تفكيرك فيه مش حيحوله لمعجزة وتلاقيه امامك , مش هو ده المقصود , المقصود ان الافكار اللى بتؤمن بيها واللى بتخليك صاحى طول الليل تفكر مش جايلك نوم هى دى اللى حتقدر تحققها .

 

,,,,,,,,,,,,,,,,,,,,,,,,,,,,,,,,,,,,,,,

 

من ضمن الافكار الخاطئة والمعتقدات الغلط اللى بنؤمن بيها زى ماقلت قبل كده –انك تكره الاغنياء او تحقد عليهم , لا تغضب منهم لأأن انت كده بتضر نفسك , لازم تبقى فاهم ان ده شخص تعب وجاهد وحارب عشان يوصل للى عمله , حتقول لى طيب ماهو فيه حرامية , دول حالات معينة مالناش دعوه بيها- مش معنى كده ان معظم اصحاب المصانع حراميه , لأ – دول ناس تعبوا وشقيوا –

  • دايما فكر فى شخص يكون قدوة ليك وحطه امام عينك . فكر فيه كتير – اعرف حياته وسيرته – عمل كده ازاى – لو قدرت تسأله اسأله , ابحث عن شخص تقلده فى الاول –الى ان يكون ليك شكلك ولونك ومميزاتك الخاصة بيك .
  • ,,,,,,,,,,,,,,,,,,,,,,,,,,,,,,,,و
  • الخطوة اللى بعد كده
  • لازم تعرف ان مافيش حاجه اسمها سوء حظ , فيه حاجه اسمها استغلال فرص , اكيد عارفين معظمنا قصة ايمي طيب شوفوها كده
  • فيديو قصة ايمي
  • لما نشوف قصة ايمي حنعرف ان مافيش حاجه اسمها سوء حظ – لأ فيه حاجه اسمها كل شيء فى حياتى بيحصل لى فرصه لحاجه , لو انا استغليت الفرصه دى .
  • ايمى استغلت العجز اللى حصل لها فى عمل حاجه رائعه , قعدت تعيط يمكن شويه لكن ادركت ان الحمدلله انها عاشت عشان لسه فيه حاجات كتير عايزه تعملها , استغلت العجز فى انها تفرح , شوفوا لدرجة ايه هى انسانه عندها ارادة , وعملت حاجات كتير ماقدرش الانسان اللى عنده كل الامكانيات انه يعملها .

هل قالت انا حظى وحش اروح اموت لأ -حاولت وجاهدت لحد مانجحت

ناهد سند

 

Advertisements

اذا كنت استفدت فلا تبخل علينا بكلمة شكر أو اضغط زر الإعجاب- لا تحتاج للتسجيل او لكتابة اميلك للتعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s